مفيش حد فينا قرر يشترى لابتوب جديد ومقابلش مشكلة انه يعرف كارت الشاشة مناسب لاستخدامه ولا لأ !

أو يختار كارت شاشة ازاى أساساً ! .. طيب ايه الفرق بين أنواع كروت الشاشة المنتشرة ؟!

أولاً كارت الشاشة عبارة عن قطعة فى تكوين الجهاز مسئولة عن توليد الصورة واظهارها على الشاشة
– طيب وتعريف كارت الشاشة ؟

دا البرنامج السوفتوير اللى بيسمحلك تستخدم كارت الشاشة

-ازاى أختار كارت الشاشة ؟

مبدئياً خلينا نتفق ان اختيار أى حاجة فى الجهاز بتعتمد أولا على طريقة استخدامها ..بمعنى ان الشخص اللى هيستخدم الجهاز فى استخدام بسيط وعادى هيختلف عن اللى هيستخدمه فى العاب فيها جرافيك عالى وعن اللى هيستخدمه فى برامج جرافيك عالية زى adobe و برامج ال 3D على سبيل المثال ..

لكن أكيد فى عوامل بتأثر على طريقة اختيارنا :
** حجم ونوع الذاكرة “الميمورى” : ودا أكبر عامل بيخدع الناس ..أولا الحجم بيقاس بGiga DDR وال DDR اختصار ل Doubla Data Rate يعنى سرعة النقل المضاعفة وفى منها DDR1,2,3,4,5 أفضلهم على الاطلاق هو DDR5 ..وبناءً عليه مش دايما كارت الشاشة اللى حجمه 2 جيجا أفضل من ال 1 جيجا !
لان ممكن يكون عندى واحد 1Giga DDR5  والتانى 2Giga DDR3 فى الحالة دى أكيد ال1 جيجا أفضل ..
وكمان لازم نعرف ان لو عندى كارت شاشة داخلى حجمه 2 جيجا مثلا بيكون متقسم (512 ذاكرة داخلية للكارت + 1.5 جيجا ذاكرة مشتركة من الرام) ومش لازم يقدر يقرأ كل المساحة دى خصوصا لو على نظام تشغيل 7 , 8 على عكس xp اللى ممكن يقدر يستخدم المساحة بالكامل فيها .. ازاى ؟!
لو اتكلمنا بالارقام هفرض ان عندك رام في جهازك 4 جيجا ، وكارت الشاشة يحتاج الي 1 جيجا ، واستهلك الويندوز الـ 4 جيجا رام بالكامل ، هيجيب كرت الشاشة الـ 1 جيجا منين !؟ يمكن دى مشكلة بتقابل ناس كتير ومبتعرفش ايه السبب او ايه الحل .. عادة الحل هنا هو تحجيم قراءة الويندوز للرام ، بحيث يقرأ 3 جيجا بدلاً من 4 جيجا وساعتها يقدر كارت الشاشة يشتغل .

** سرعة التوقيت GPU Clock : ودا من العناصر المهمة جدا وهو بيدل على سرعة نقل البيانات فى الكارت أو بمعنى أصح الزمن اللى بيستهلكه الكارت فى معالجة أى جرافيكس وبالتالى كل ما كان سرعة الوقت أعلى كل ما كانت السرعة أعلى وبيتم قياسه بالميجاهيرتز .

** دقة الشاشة Max Resolution : ودى معناها أعلى دقة ووضوح للشاشة ممكن يوصلها الكارت وطبعا هنا أصحاب الشاشات الكبيرة لازم يهتموا جدا ويفضل انهم يختارو اللى يديهم HD او full HD

** DirectX : وهو عبارة عن مجموعة تعريفات علشان لو عندك ألعاب مثلا تشتغل بشكل أفضل ولازم كارت الشاشة يكون بيدعم أحدث DirectX .

** Shaders : بتنقسم لقسمين pixel shaders , vertx shaders والاتنين بيكملو بعض ومتعلقين بجودة ووضوح الصورة وطبعا لها أكتر من اصدار وطبعا كل مايكون اصدار حديث كل مايكون أفضل .

** Bandwidth : ومعناه بشكل مبسط انها كمية المعلومات اللى يمكن للمعالج انه يعالجها فى الثانية الواحدة وهو بيشير لسرعة النقل للذاكرة وكل مازادت كل مايكون أفضل .

– طيب دلوقتى فى أنواع كتير لكارت الشاشة بشركات مختلفة زى Gigabyte أو MSI أو Sapphire أو Asus أو XFX أو غيرها

نختار بينهم ازاى ؟؟

عموما لازم تعرف ان كل الشركات بتشتريه من شركتين هما Nividia و AMD -اللى اشترت ATI – وبتقوم بصناعة ال motherboard الخاصة بيه وتعدل بعض المميزات فقط ..

– مين أفضل Nividia ولا AMD ؟
الشركتين فى منافسة كبيرة تطور كبير جدا طول الوقت ونقدر نعتبر الفروق بين الكروت بينهم فى الكروت الغالية اللى سعرها فى مصر أعلى من 900 جنيه وفى الحالة دى هتكون Nividia خيار أفضل أما لو محتاج كارت كويس الى حد ما وبسعر قليل فهتكون AMD ..لكن عموما الشركتين مش هما المقياس فاختار على حسب العوامل اللى اتكلمنا عنها أفضل .

– لو هنزل العاب ومحتاج أعرف متناسبة مع كارت لشاشة اللى عندى أو هشتريه أعمل ايه ؟

هتدخل على الموقع دا http://systemrequirementslab.com/cyri  واكتب اسم اللعبة وهيظهرلك كل متطلبات الهاردوير المطلوبة . ho

مستنيين تعليقك

عن المؤلف

Mai Amer