مهما إختلفت شخصية اللي هيقابلك في مقابلة الشغل اللي هتروحها، هيبقي فيه أسئلة دائما بتتكرر من وقت للتاني في كل المقابلات – جمعنالك إنهاردة أشهر 15 سؤال بيتسألهم الـ Help Desk.

في التخصص ده بيكون التركيز علي المهارات الشخصية أكثر بكثير من المهارات التقنية (فيه شركات ممكن تقبلك وانت زيرو تكنيكال بس ناجح جدا في الـ Soft Skills) وعلشان كدة ممكن تسمع أسئلة غريبة منها الآتي :

1- إيه أهمية خدمة العملاء – customer service ليك ؟

خدمة العملاء هنا بتشمل الموظفين نفسهم اللي شغالين في الشركة، لإن قسم الـ IT في أي شركة بيعتبر شركة صغيرة جوا الشركة بتقدم خدماتها للعميل. خدمة العملاء هي أهم شئ في البيزنس بتاعنا وهي اللي بتقوم عليه تقديم الـ service كلها فمن غير الإهتمام بيها مفيش بيزنس أصلا

2- هل انت شايف ان الشركات بتحتاج help desk ؟

أساس نجاح أي شركة هو مصادرها اللي عارفة كل التفاصيل الصغيرة، ودي بالظبط مهمة الـ help desk. من غيره بتفقد الشركة (خصوصا لو شركة IT) الروابط بين العملاء وبين إدارة الـ IT

3- إيه أهم الـ IT skills اللي المفروض تكون عارفها ؟ وإزي تخلي نفسك updated دائما ؟

إجابة السؤال ده بإنك “تحفر لتحت مش تطلع لفوق” بمعني تغوص أكثر في تفاصيل الكورسات مش إنك تتكلم علي تقنيات عالية – وتكون updated دائما بالقراءة والـ labs اللي بتعملها كثير

4- إزي تتعامل مع عميل غاضب جدا ؟

“أسمعه لغاية الآخر واسأله أسئلة واضحة علشان افهم المشكلة بدون أي فهم غلط” – في الغالب بتكون الجملة دي كافية بس ممكن تكمل عليها بموقف حصلك

5- إيه أهم المميزات في أي help desk ؟

السمع / الصبر / إمكانية عرض المعلومات والحلول بصورة سهلة

6- ليه ممكن تكون help desk ناجح ؟

إجابة السؤال ده بتتحدد بناءا علي طبيعة الشغل، اللي هي التواصل مع الناس وحل مشاكلهم

7- إزي تساعد عميل مبيتكلمش لغتك ؟

أكيد هتكونوا بتتكلموا لغة وسيطة زي الإنجلش – وفي أسوأ الأحوال في حالة إنك شايفه ممكن عن طريق الإشارة أو عن طريق Google Translate لو علي السماعة

8- أسوأ تجربة مريت بيها كـ help desk ؟

متفكرش في أي موقف كنت إنت غلط فيه — ومتقولش مفيش !

9- إزي ترد علي عميل لما متكنش عارف إجابة سؤاله ؟

لو كلكم في نفس الشركة – قول “معرفش” صريحة وواضحة وممكن تلجأ إن دي أعلي من مسؤولياتك في الشركة ولازم ترجع لمديرك أو اللي إعلي منك

10- هل تتقبل إنك تشتغل في الـ weekend ؟

لازم إجابة مرنة وصريحة في نفس الوقت وبتتحدد بناءا علي الشركة اللي انت بتقدم فيها – ساعات إجابة “ممكن طالما هاخد يوم مكانه” بتكون كافية وبتزيد من إحترام اللي بيسألك

11- إيه أكثر حاجة بتحبها في شغلك ؟

التحدي في كل مشكلة بتقابلك وإزي تحلها والمعلومات الجديدة اللي بتستفادها

12- بتقيم نفسك وخبرتك بكام / 10 ؟

مينفعش متردش لأنه هيكون عدم ثقة في النفس ومينفعش تقول 10 — 8 أو 8.5 إجابة مقنعة

13- إزي بتتعامل مع النقد ؟

دي ترجعلك – بس حاول تكون إجابة مرضية للطرفين بدون أي “نفاق”

14- هل تقدر تحل مشكلة عن طريق التليفون ؟

الإجابة لازم تكون بمثال سابق حتي لو كان مع أصحابك – المهم لازم مثال

15- أكثر حاجة مبتحبهاش في الوظيفة دي ؟

حاول تكون إجابتك مختصرة علي قد ما تقدر وبحاجة تكون إيجابية مش سلبية – زي مثلا مبتحبش يكون فيه down time في الشبكة أو أي حاجة توحي اللي قدامك إنك كدة كدة بتحب الشغل برضه

الإجابات الواضحة والصريحة بدون نفاق هي الأقصر والأسهل في أي إنترفيو خاص بالوظيفة دي بالذات .. يمكن المجاملة في الإجابات هتخليك تتقبل في الوظيفة لكن مش هتضمن ليك تكمل أكثر من 3 شهور فيها – إنت وحكمك علي الموقف

مستنيين تعليقك

عن المؤلف

Ahmed Alhawary

مدون حر أهتم بالأخبار التقنية عامة والمقالات الموجهة للمختصين في عالم تكنولوجيا المعلومات خاصة