أمن وحماية

9 طرق تحمي بيهم نفسك علي الإنترنت

ملايين من كلمات السر تسرق كل سنة. الناس بتفقد فلوسها، وظائفها وساعات بتوصل لحياتها بسبب الهاكرز وأفعالهم. ومع ذلك فيه كثير من الناس مش واخدة مبدأ الحماية بجدية وبيكونوا أهداف لهجمات محتملة سهلة جدا بسبب ضعف الحماية علي أجهزتهم.

فيه دراسة مؤخرا أثبتت إن أغلب مستخدمي الإنترنت ما زالوا بيستخدموا كلمات مرور ضعيفة وكسولة جدا من السهل اختراقها. لو فعلا مش عايز تكون ضحية لهجمات قريبة – اقرأ النصائح الجاية من McAfee لتصفح إنترنت آمن أكثر.

1- إختار كلمات مرور معقدة أكثر

حاول تختار كلمات مرور مكونة من حروف Upper-Lowercase مع أرقام ورموز زي &^% واللي بتخلي إمكانية التخمين فيها مستحيلة – يعني كلمة مرور زي : It@Wy!#P@$s – ولازم تغيرها كل 6 شهور في المتوسط. ممكن تستخدم برنامج واحد لتخزين كلمات المرور كلها الخاصة بيك زي برنامج LastPass

2- إستخدم كلمة مرور مختلفة لكل ويبسايت

أكيد من الصعب جدا إنك تفتكر كلمة مرور مختلفة لكل موقع إنت بتستخدمه – لكن من السهل إنك تعمل تركيبة معينة لكل المواقع تستخدم فيها اسم الموقع نفسه في كلمة المرور بصورة غير مباشرة – مثلا تختار أول و ثالث حرف إسم من كل موقع + تركيبة ثابتة بعدها – زي كدة “للفيسبوك ممكن تستخدم F!8c#P@$s ولتويتر T!8i#P@$s وهكذا “

لو مش مقدر خطورة إنك تستخدم كلمة مرور مختلفة لكل موقع، تخيل لو حد قدر يعرفها بصدفة ما – هيكون إيميلاتك كلها وحياتك في إيديه بشكل سهل جدا

3- خليك ذكي وإنت بتستخدم برامج الـ IM

وإنت بتستخدم برامج الشات المختلفة تجنب إرسال أي داتا خاصة بيك ومتقبلش إضافة من أي حد غريب وتجنب ذكر بياناتك الحقيقية زي تاريخ الميلاد والعنوان مفصلا .. إلخ علشان المعلومات دي ممكن تستخدم في الهاكنج واللي بنسميها “الهندسة الإجتماعية – Social Engineering”

4- إستخدم two-factor authentication

جوجل بتقول إن لازم كل المستخدمين يستخدموا طريقة “تأكيد الهوية في خطوتين”. الطريقة دي بتوفر طبقة حماية زيادة من خلال إرسال رسالة مثلا علي موبايلك/إيميلك بكود معين علشان تقدر تستخدم حسابك

5- إحمي جهازك والمتصفح الخاص بيك

مضاد فيروسات قوي ومحدث أول بأول هو أقل قواعد الحماية اللي لازم تكون علي أجهزة كل المستخدمين تقريبا. طبعا بالإضافة لتحديث نظام التشغيل نفسه بأجدد تحديثات الحماية المتوفرة

6- تأمين الـ WiFi

في 3 خطوات سهلين جدا ممكن تصعب بشكل كبير علي إختراق الشبكة بتاعتك – أولهم إستخدام كلمة مرور صعبة زي ما شرحنا في رقم 1، وتغغير إسم النيتورك لإسم مميز، وإخفاء الشبكة عن طريق عدم إختيار SSID Broadcasting في الشبكة

7- تسوق علي مواقع مأمنة فقط

لو من هواة التسوق أونلاين، حاول تبعد عن أي موقع مشبوه أو غير موثوق منه، وإن يكون تصفحك للموقع مأمن بـ https قبل إستخدام بطاقة إئتمانك. سيرش بسيط علي جوجل علي أي موقع قبل ما تشتري منه هيفيدك تكون وجهة نظر بسيطة عنه وعن مصداقيته

8- فكر قبل ما تدوس علي أي لينك

أشهر وأسهل طرق الإحتيال علي الإطلاق، مجرد ضغطة منك بنية سليمة جدا ممكن تأدي لسرقة هويتك كاملة من خلال إن اللينك يكون مرتبط بموقع مزور مشابه لموقع بتستخدمه زي الفيسبوك مثلا. فقبل ما تفكر تفتح أي لينك إعرف الأول هيوديك علي فين وتأكد من اللينك في الـ address bar قبل أي تسجيل دخول

9- إحمي تليفونك بكلمة مرور

التليفونات حاليا أغنتنا تمام عن الأجهزة علشان كدة أغلب إستخداماتنا بتكون من عليها وفي الغالب الـ credit card بتكون مسجلة عليه، علشان كدة تأمين التليفون ميقلش في الأهمية عن أي نقطة من النقط اللي ذكرناها.

دي كانت جزء من النصائح اللي بتأمنلك تصفحك أكثر علي الإنترنت، لو عندك نصيحة زيادة شاركنا بيها في تعليق 🙂

الوسوم

Ahmed Alhawary

مدون حر أهتم بالأخبار التقنية عامة والمقالات الموجهة للمختصين في عالم تكنولوجيا المعلومات خاصة

مقالات ذات صلة

شاهد أيضاً

إغلاق
إغلاق